الحب يلي تغني سكر ستاره
مالك ومال الهوى والحب والذكرى

هذا وليفي حبيب القلب و انواره
لأجله نظمت القوافي شعر ونثرا

عليه قلبي يحن ويكسر اسواره
اكتب مشاريه حبي والملا تقرا

يا ليتني في ضواحي حارته جاره
واشوف زوله ولو الخلق بي تزرا

يالله ياللي كل مؤمن يطيعه
يامروي عقب المحل كل روضي

ياللي على الشده حصونك منيعه
ياللي لك المسلم يصلي الفروضي

تطفي لهايب بالضماير وليعه
على فؤادي والمعاليق توضي

لفراق بنت العم كني جضيعه
الله يصبرني على فقد موضي

الغاليه جتها سهوم سريعه
راضين حكم اللي علينا يعوضي

فجيعة ياكبرها من فجيعه
لا جابو الطاري خفوقي يجوضي

من بعدها ضاقت علي الوسيعه
كني مجاهد فالمعارك يخوضي

ياجعلها في جنان رب الوديعه
في جاه من بامره بروقه تنوضي

الموت حق وكلنا في طليعه
الله يسهلها ليا جاء المخوضي

ولخوي ابو نايف بنفس مطيعه
ارفع مواساتي على فقد موضي

ياناس حبه برى حالي
لاقال احبك من لسانه

أنا اشهد انه هو الغالي
من بعد فرقاه تعبانه

من بعد فرقاه عزالي
ومن غيبته صرت حزنانه

يا غايتي يا هوى بالي
هذا البطى وش هي الوانه؟!

لاجاك خطي ومرسالي
لاتلومني صرت ولهانه

البيت بعدك خلا خالي
يا شين هالبيت واركانه

صوتك وطيفك على بالي
يداعب الفكر بالحانه

يفداه روحي مع المالي
وهذا اعترافي على شانه

غالي ويشتاق للغالي
والطاير يحن لغصانه

أختامها أنت أمالي
ياتاج قلبي وشريانه

الله الله وا شرقت شمسي شروق
وا بتدى في خافقي حب الوله

ياهواي اللي تغلغل فالعروق
ينبض بقلبي ودمي يحمله

اه ياحب يرفرف لي بروق
يا مشاعر كل يوم تذوب له

سكرتي في خمر حبه ماتفوق
كود اضمه فوق صدري وامهله

بالحبر والشعر انا صغت الوثوق
من خفوقي كل همسة حب له

دام باقي لي معه حب وشوق
كل جرح في طريقي باهمله

والأمل براق والحزن مخنوق
والهوى طفل وحنا ندلله

أنشدينا ياتباريح الطروق
الوفا ظل القلوب تظلله

طال انتظاري والهواجس مناديب
وين الوعد ولا على الرف كنا

يالله عساها في دروبك تراحيب
ويسعد حياتك لوتخليت عنا

لاغبت عني وش تفيد المطاليب
رخصت نفسي والهوى بي تجنى

مليت اعيش بصمت بين ال الاعيب
من كان منا صار ماهوب منا

تعبت أدور للمفارق تقاريب
وليه المفارق يرتحل عن وطنا

اللي نبيه يغيب باقي ولا يغيب
ومن كنت أبي قربه ترى غاب عنا

الهجر والخذلان والشك والريب
هاذي بقايا من الغلا في زمنا

عجل علي زاد بي الويل
ياروح روحي ووجداني

يالله عسى ديرتك للسيل
يسقيك ياروض بستاني

اشتقتلك يالغلا بالحيل
ومن العنا كثرت احزاني

القلب ميل عليكم ميل
روح معاكم وخلاني

اسهر واساهر نجوم الليل
والنوم ياشوق ماجاني

منزلك عندي شبيه سهيل
ويحرم على واحد ثاني

اذلل النفس لك تذليل
واغليك يانور الاعياني

ياويل حالي عليكم ويل
لك زود الشوق حرماني

أشتاق لك في سكون الليل
واحتاج اضمك بالاحضاني

بعد الحبايب يهد الحيل
وانا بك الحظ مناني

أخاف وقتي يجي به ميل
وتصعب مواصيل خلاني